Serbia dhe Kroacia tejkalojnë Rusinë si partnerë tregtarë të Gjermanisë
Rusia ka humbur rëndësinë si partner tregtar i Gjermanisë, duke u renditur në vendin e 48-të në gjysmën e parë të vitit 2025, pas një rënie të vazhdueshme të shkëmbimeve tregtare pas pushtimit të Ukrainës dhe sanksioneve të BE-së. Importet nga Rusia nuk arritën as 670 milionë euro, ndërsa eksportet ranë në pak mbi 3.5 miliardë euro.
Në vend të saj, Serbia dhe Kroacia po fitojnë terren. Sipas “Komisionit për Lindjen” të ekonomisë gjermane, Serbia është në vendin e 9-të dhe Kroacia në vendin e 11-të ndër partnerët më të rëndësishëm të Gjermanisë në Evropën Lindore.
Tregtia Gjermani–Serbi arriti në rreth 890 milionë euro deri në qershor, një rritje prej 16.9% krahasuar me një vit më parë, ndonëse ritmi i rritjes po ngadalësohet. Investimet e huaja direkte në Serbi ranë me 77% në katër muajt e parë të vitit, por rritja e pagave dhe planet për t’u bashkuar me Zonën Evropiane të Pagesave (SEPA) në 2026 mbeten sinjale pozitive për konsum dhe bashkëpunim ekonomik.
Kroacia regjistroi një rritje tregtare prej 8.2% me Gjermaninë, por përballet me presione të larta inflacioniste, veçanërisht në sektorin e shërbimeve. Çmimet janë rritur ndjeshëm, ndërsa konkurrueshmëria në turizëm po vihet në pikëpyetje.
Megjithë sfidat, të dyja vendet po përfitojnë nga ristrukturimi i zinxhirëve të furnizimit dhe orientimi gjerman drejt tregjeve më të afërta, duke u bërë partnerë gjithnjë e më të rëndësishëm ekonomikë për Berlinin.
